پەیامی کورد   ...   لە کاتێکی نزیک پڕۆژەی وێستگەی ئۆمەراوە دەکەوێتە کار

به گوژمه 1 ملیار و 700 ملیۆن دینار، دەست کرا بە پڕۆژەی دانانى وێستگەی موبایلى ئۆمەراوە، بەمەش كێشەی كارەبای سنووری شارۆچكەی قوشتەپە و 42 گوندی دەشتی هەولێر چارەسەر دەبێت.

وێستگەی موبایلى ئۆمەراوە بریتیە لە دەرهێنانى 6 فیدەر لە وێستگەکە بۆ چارەسەرکردنی بارزۆری 12 فیدەری سنووری شارۆچكەی قوشتەپە و چارەسەری کێشەی 42 گوندى دەشتی هەولێر، کە کێشەی ئۆڤەرلۆد و کەمی ڤۆڵت یان هەبوو.

بەکردنەوەی وێستگەی موبایلى ئۆمەراوە نزیکەی %90 کێشەکانی کارەبای سنووری شارۆچكەی قوشتەپە چارەسەردەبێت.

جێگای وه‌بیرهێنانه‌وه‌یه‌ له‌ سه‌ردانێكی پێشووتری دا بژار مەلا خدر قایمقامی قەزای قوشتەپە بۆلای کەمال محەمەد ساڵح وەزیری کارەبا، باسیان لە پێداویستی  کارەبای سنووری قەزای قوشتەپە و دانانی وێستگەیەکی مۆبایل بۆ سنوورەکە کردبوو.

وەزیری کارەبا جەختی لەسەر گرینگی چارەسەرکردنی کێشەکانی گواستنەوەی کارەبا و کەم کردنەوەی بارزۆری سەر تۆڕەکانی کارەبا کرد بوو و ئامادەیی وەزارەتی بۆ هەموو کارئاسانییەک بۆ قەزای قوشتەپە دەربڕی.

ئه‌مڕۆش پارێزگای هەولێر رایگەیاند، پڕۆژەی دانانی وێستگەی موبایلى ئۆمەراوە تەواوبووە و لەو نزیکانە دەکەوێتە کار.