پەیامی کورد    ...   وەزارەتی داد ئامانجی پلانی ستراتیژی نیشتمانی ده‌خاته‌ڕوو

ووتەبێژی وەزارەتی دادی حکوومەتی ھەرێمی کوردستان رایدەگەێنێت، پڕۆژەی نیشتیمانی ستراتیژیەتی بەھێزکردنی سەروەری یاسا و چەسپاندنی دادپەروەری بۆ پێنج ساڵی داھاتوو ڕادەگەێندرێت و ئامانج لێی جێبەجێکردنی بەندەکانی دەستووری عێراقە، کە کلیلی چارەکردنی کێشەکانی نێوان ھەولێر و بەغدایە.

ووتەبێژی وەزارەتی دادی حکوومەتی ھەرێمی کوردستان، نەریمان تالب، ڕایگەیاند، لە سەرەتای مانگی حەوتی ئەمساڵ دا بریکاری وەزارەتی دادی حکوومەتی ھەرێمی کوردستان و جێگری دووەمی سەرۆکی تیمی نیشتیمانی لە بەغدا بەشدارییان لە کۆنفرانسی ڕاگەیاندنی ستراتیژی بەھێزکردنی سەروەری یاسا و چەسپاندنی دادپەروەری بۆ ساڵی ٢٠٢٥ تا ٢٠٢٩دا کرد، کە ئەم ستراتیژیەتە بەرھەمی کاری ھاوبەشی  نوێنەرانی دەزگا و لایەنە پەیوەندیدارەکانە، کە لە ماوەی ساڵانی ڕابردوو ناویان ھاتووە لە فەرمانی دیوانی ژمارە ٧٠ی ساڵی ٢٠٢٤، کە دووپاتکردنەوە لە سەروەری یاسا، ھیچ مانایەکی نامێنێت ئەگەر دەستوور سەروەری نەبێت و بەندەکانی دەستوور بە تەواوی جێبەجێ نەکرێن، کە کلیلی چارەسەری کێشەکانی نێوان ھەرێمی کوردستان و بەغدایە.

ووتەبێژی وەزارەتی دادی حکوومەتی ھەرێمی کوردستان ڕوونیشی دەکاتەوە، ڕێکخراوی لێکۆڵەر پاڵپشتە بۆ سەروەری یاسا  و خاوەن دەست پێشخەری پڕۆژەکە بووە لەگەڵ ڕێکخراوی نێودەوڵەتی NPAی نەرویجی، کە پاڵپشتی دارایی پڕۆژەکە بووە، بۆیە پلانی جێبەجێکردنی پڕۆژەکە ئامادە دەکرێت و لەسەر ئاستی حکوومەتی عێراق و ھەرێمی کوردستان بەندەکانی ناوەڕۆکی ستراتیژییەتەکە بۆ پێنج ساڵی داھاتوو دەبێت.

نەریمان تالب، هەروەها ئاماژەی بۆ ئەوەش کرد، ھەر لە مانگی حەوتی ئەمساڵ دا وەزیر و بریکاری وەزیری دادی حکوومەتی ھەرێمی کوردستان بەھۆی پاڵپشتی رێکخراوی لێکۆڵەر بۆ پاڵپشتیکردنی سەروەری یاسا و رێکخراوی NPAی نەرویجی لە کاتی نووسینەوە و دانانی ستراتیژییەتی نیشتیمانی بۆ بەھێزکردنی سەروەری یاسا و چەسپاندنی دادپەروەری ئامادە بوون، چونکە ڕۆڵێکی گرینگیان ھەبوو لە شوێنکردنەوە و چەسپاندنی سەروەریی یاسا و چەسپاندنی دادپەروەری لە کاتی داڕشتن و ئامادەکردن و نووسینەوە و ڕاگەیاندنی ستراتیژیەتەکە، کە بریتی بوو لە جێبەجێکردن و چەسپاندن و پاراستنی دەستووری عێراق و جێبەجێکردنی ماددەکان و سازشنەکردنی لەسەر مافە دەستوورییەکانی ھەرێمی کوردستان لە دەستووری عێراقدا، کە وەزارەتی داد دووپاتی کردەوە ئەو بنەمایانە کە داواکاری ئێمە بوون، ببنە بابەتی سەرەکی ستراتیژیەتەکە، کە پێشتر لە رەشنووسەکەدا جێی نەکرابووەوە.

ناوبراو دەشڵێت، بۆ ئه‌و مه‌به‌سته‌ش تیمی نیشتیمانی ستراتیژییەتی بەھێزکردنی سەروەری یاسا و چەسپاندنی دادپەروەری لەگەڵ وەزیری ناوخۆی حکوومەتی ھەرێمی کوردستان دوایین ھەنگاوەکانی پلانی ستراتیژیەتی نیشتیمانییان تاوتوێ کرد و وەزیری ناوخۆی حکوومەتی ھەرێمی کوردستانیش پشتگیری خۆی بۆ ئەو ستراتیژیەتە دووپات کردەوە دوای ئەوەی پڕۆژەکە لەلایەن ئەنجوومەنی وەزیرانی ھەرێمی کوردستانەوە پەسند دەکرێت.