پەیامی کورد   ...  فەرمانگەی پەیوەندییەکان : گەورەترین شاندی بازرگانی ئەمریکا سەردانی ھەرێمی کوردستان دەکات

بەڕێوبەری پەیوەندی و ڕاگەیاندنی فەرمانگەی پەیوەندییەکانی دەرەوەی حکوومەتی ھەرێمی کوردستان دەڵێ، حکوومەتی ھەرێم بەردەوام لەگەڵ ووڵاتان ھەوڵ دەدات بێن نوێنەرایەتی خۆیان لە ھەرێمی کوردستان بکەنەوە و ئێستا نوێنەری ٣٥ ووڵات لە ھەرێمی کوردستان ھەن و بڕیارە بەم زووانەش گەورەترین شاندی بازرگانی ئەمریکی سەردانی ھەرێمی کوردستان بکەن.

عەبدۆلخالق محەمەد، بەڕێوبەری پەیوەندی و راگەیاندنی فەرمانگەی پەیوەندییەکانی دەرەوەی حکوومەتی ھەرێمی کوردستان، ڕایگەیاند، "پڕۆژەیەک ھەیە بە ناوی دارستانی کۆنسووڵخانەکان لە شاری ھەولێر، ئەمە بیرۆکەی فەرمانگەی پەیوەندییەکانی دەرەوەی حکوومەتی ھەرێمی کوردستانە و پێشنیازی کردووە و قسەش لەگەڵ شارەوانی و لایەنی پەیوەندیدار کراوە و زەوی دابین کراوە و کاردەکرێت بۆ بەدواداچوونی زیاتر و ئامادەکردنی دیزاینی باشتر، بۆ ئەو مەبەستەش قسە لەگەڵ کۆنسووڵخانەکان دەکرێت بۆ ئەوەی بزانین کامەیان ئامادەن بەشداری لەو پڕۆژەیەدا بکەن، ئەمەش بۆ ئەوەی ڕێژەی سەوزایی لە ھەرێمی کوردستان زیاتر بێت، چوونکە کۆنسووڵخانەکانیش ئەم پڕۆژەیەیان پێ باشە و ووڵاتی چین بڕیارە حەوت پارک درووست بکات، یەکێک لەوانە تەواو کراوە، بۆیە کۆنسووڵخانە و نوێنەرایەتی ووڵاتان لە ھەرێمی کوردستان ھەمیشە ھاوکار و پاڵپشتن لەگەڵ ئێمە.

بەڕێوبەری پەیوەندی و ڕاگەیاندنی فەرمانگەی پەیوەندییەکانی دەرەوە ووتیشی، "لە ھەرێمی کوردستان ٣٥ ووڵات بە ئاستی جیاواز بوونیان ھەیە، بەشێکی کۆنسووڵخانەی گشتی، بەشێکیان کۆنسووڵخانە، بەشێکی دیکە نووسینگەی باڵیۆزخانە و بەشێکیش کۆنسووڵخانەی فەخرین و نوێنەری وڵاتان بە گشتی ژمارەیان ٣٥ ووڵاتە، کە ووڵاتانی دەورووبەری وەکوو تورکیا، ئێران، ووڵاتانی کەندئاو سەعوودیە و قەتەر و ئیمارات و کوێت و میسر و ووڵاتانی ئەورووپا و ئەمەریکا لە ھەرێمی کوردستان ھەن.

دەشڵێت، "زۆر ووڵاتی دیکەش بەنیازن بێن نوێنەرایەتی لە ھەرێمی کوردستان بکەنەوە، سەرۆکی فەرمانگەش لە ھەموو دیدار و سەردانەکان جەخت لەسەر ئەوە دەکاتەوە و ھانیان دەدات نوێنەرایەتی لە ھەرێم بکەنەوە و کۆمپانیاکانیان بێن لە ھەرێم وەبەرھێنان بکەن، کە ئەوە سیاسەتی حکوومەتی ھەرێمی کوردستانە و لە پێناو بەرژەوەندی ھەردوو لایەنە.

لە درێژەی لێدوانەکەیدا ڕایگەیاندووە ، عەبدۆلخالق محەمەد ئاشکرای دەکات، لە ماوەیەکی نزیکدا گەورەترین شاندی بازرگانی ئەمریکا سەردانی ھەرێمی کوردستان دەکات بۆ پەرەپێدانی پەیوەندی ئابووری و بازرگانی لەگەڵ ھەرێمی کوردستاندا.