20ê Çile ji bo hilbijartina ‘Dersa Kurdî’ roja dawî ye
PeyamaKurd – Kampanyaya hilbijartina dersa Kurdî (kurmancî-zazakî) li dibistanên Tirkiye û bajarê Bakurê Kurdistanê berdewam dike.
Xwebexşên zimanê Kurdî bi pêşengiya Hereketa Zimanê Kurdî (HEZKURD), sazî û komeleyên civakî bangewaziyê li dê û bavên zarokên Kurd dikin, li dibistanan ji dersên bijarte, dersa Kurdî hilbijêrin.
Wezareta Perwerdeyê ya Tirkiyê, ji sala 2012an ve biryar daye ku di çarçoveya Ziman û Zaravayên Zindî de, zimanê Kurdî jî wek dersa bijarte ji bo polên 5,6,7,8 li dibistanan bê xwendin.
Xwendekarên dibistanan ji bo sala perwerdehiyê ya 2023-2024an heta 20ê Çileyê dikarin dersa Kurdî hilbijêrin û dibistanên xwe ji tercîhên dersa hilbijartî agahdar bikin.
Derbarê mijarê de, Komîsyona Zimanê Kurdî ya Baroya Şirnexê jî li ser xalên ku pêwîste xwendekar û malbatên wan jê agahdar bin peyameke alîkariya hilbijartina dersa bijarte belav kir.
Komîsyona Zimanê Kurdî ya Baroya Şirnexê ji bo tiştên bo dersa bijarte bên kirin diyar kiriye; “Bi forma ku ji aliyê rêveberiya dibistanan ve hatiye dayîn di Beşa Zimanên Zindî de dersên Kurmancî û Zazakî dê were hilbijartin.
Eger form ji aliyê rêveberiya dibistanê ve nehatibe dayîn dê form bê xwestin û eger di formê de Zimanê Zindî û Kurmancî tune be dê bi destan bê nivîsandin.
Form dê bo dibistanê were radestkirin.
Roja dawî:
20ê Çile roja dawîn e û divê heta vê demê ders bêne hilbijartin.”
Ev nivîs 210707 car hatiye xwendin.
