Mazlûm Ebdî li gel rûspiyên Reqayê civiya

PeyamaKurd – Fermandarê Giştî yê Hêzên Sûriyeya Demokratîk (HSD) Mazlûm Ebdî li gel rûspiyên Reqayê civiya û piştî wê civînê “efûyeke taybet” ragihand.

HSDyê li ser vê yekê daxuyaniyek belav kir. Di daxuyaniyê de hat gotin ku “General Mazlûm Ebdî, li ser daxwaza gel û li gor ruhê cejna pîroz, efûyeke taybet ragihand ku gelek dosyeyên ewlehiyê li xwe digire.”

Li gorî daxuyaniyê, Mazlûm Ebdî ji wan kesayetiyan re ku beşdarî civînê bûn, ravekirineke berfireh û hûrgilî li ser bûyerên dawî yên li Sûriyeyê û herêmê pêşkêş kir ku rêkeftina girîng a di navbera Rêveberiya Rojavayê Kurdistanê û Şamê de jî tê de hebû.

HSD û Şam gihîştibûn rêkeftinekê ku girtiyên hevbeş tê de dihatin berdan û destûra mayîna hêzên ewlehiya navxweyî (Asayîş) ên bi ser HSDyê ve li taxên Kurdan ên Helebê; Şêx Meqsûd û Eşrefiyê jî dida.

Di daxuyaniyê de hat diyarkirin ku endamên heyeta ku bi Ebdî re civiyan, ji vê pêşketina ku ew wekî gaveke girîng dibînin dilxweşiya xwe anîn ziman.

Ev nivîs 51 car hatiye xwendin.