پەیامی کورد   ...   ڕوونكردنەوەیەك لە وەزارەتی ناوخۆی حكوومەتی هەرێمی كوردستان ەوە

وەزارەتی ناوخۆی هەرێمی کوردستان بڵاویکردەوە، لە ئەنجامی ناکۆکی نێوان چەند کەسێک لە سەر کێشەی زەوی و زار، گرژی و نائارامی لە ناوچەی خەباتی سەر بە پارێزگای هەولێر دروست بوو کە بە داخەوە بووە هۆکاری زیانی گیانی و ماددی.

پێنجشەممە 10/7/2025، وەزارەتی ناوخۆی حكوومەتی هەرێمی كوردستان، ڕوونكردنەوەیەكی بڵاو كردەوە و تێیدا هاتووە، "‎لە ئەنجامی ناکۆکی نێوان چەند کەسێک لەسەر کێشەی زەوی وزار، گرژی و نائارامی لە ناوچەی خەباتی سەر بە پارێزگای هەولێر درووست بوو کە بەداخەوە بووە هۆی زیانی مرۆیی و دارایی."

ئەوەش خراوەتە ڕوو، "بە هەوڵی لایەنە پەیوەندیدارەکانی حکوومی و حیزبی و هێزەکانی ئاسایشی ناوخۆ، توانرا هەر زوو ئەو کێشەیە سنووردار بکرێت و بە هاوکاریی خەڵکی دەڤەرەکە ناوچەکە ئارام کرایەوە، ڕێکاری یاساییش بۆ چارەسەری ناکۆکییەکان و سزادانی سەرپێچیکاران دەستی پێکردووە."

وەزارەتی ناوخۆ داوا لە خەڵكی ناوچەكە دەكات، "بە قسەی ناحەزان و هاندانی دەستی گومانئاوی هەڵنەخەڵەتێن و بەردەوام بن لە پابەندی بە ڕێنماییەکانی ئاسایش، هاوکاریش بن بۆ نەهێشتنی گرژییەکان و سەقامگیری ئەو دەڤەرە."

لە ڕوونكردنەوەكەدا جەخت لەوەش كراوەتەوە، ‎"ئارامی و ئاسایشی هەموو ناوچەکانی هەرێمی کوردستان لە سەرووی هەموو شتێکەوەیە و ڕێگە بە هیچ کەس و لایەنێک نادرێت بە هەر مەبەستێک بێت، پەرە بە نائارامی و گرژی بدات.

وەزارەتی ناوخۆ هاووڵاتیانی هەرێمی كوردستان دڵنیا دەكاتەوە، "کوردستان هەر بە سەقامگیرترین ناوچە لە دەڤەرەکەدا دەمێنتەوە."