230 kes bi gumana jehrîbûna xwarinê rakirin nexweşxaneyê
PeyamaKurd – Li parêzgeha Enbarê ya Iraqê, 230 kes bi gumana jehrîbûna ji ber xwarina bilez rakirin nexweşxaneyê. Karbidestên tenduristiyê ragihandin ku goştê ku bûye sedema jehrîbûnê ji derve hatiye hawirdekirin û tu eleqeya wî bi hilberîna navxweyî re tune ye.
Berdevkê Rêveberiya Tenduristiyê ya Enbarê Muhammed Derajî gotiye, "Heta îro, hejmara kesên ku bi giliyên jehrîbûna xwarinê serî li nexweşxaneyan dane gihîştiye 230 kesan. Piraniya nexweşan piştî dermankirina pêwîst ji nexweşxaneyê derketine."
Hate diyarkirin ku piraniya jehrbûnan ji ber xwarinên bilez ên wekî hamburgeran çêdibin. Hat ragihandin ku tenê heta saetên sibehê 130 kesan serî li nexweşxaneyan dane.
Muhammed Deraci, derbarê goştê ku hatiye tespîtkirin ku dibe sedema jehrîbûnê de got, "Goştê ku tê bikaranîn goştê heywan û mirîşkê yê hawirdekirî ye, ne girêdayî hilberîna navxweyî ye."
Kesên jehrîbûyî bo sê nexweşxaneyên cuda li navçeya navendî ya Felûceyê ya Enbarê hatin veguhastin û hatin dermankirin.
Piştî bûyerê, tîmên tenduristiyê ji xwaringehên ku berhemên gumanbar lê dihatin pêşkêşkirin nimûne berhev kirin û dest bi lêkolînên laboratîfê kirin. Herwiha dest danîne ser goştê ku guman tê kirin ku bûye sedema jehrîbûnê.
