Papa li ser Xezzeyê daxuyaniyek weşand
PeyamaKurd - Papa Leoyê 14. rêberê ruhanî yê Katolîkan, rewşa mirovî ya li Xezzeyê, ku di bin dorpêça Îsraîlê de ye, wekî "giran" bi nav kir û got ku ew bi fikarek mezin wê dişopîne.
Papa Leoyê 14. rêberê ruhanî yê Katolîkan û Serokê Dewleta Vatîkanê, li ser hesabê xwe yê medyaya civakî li ser mijarên navneteweyî daxuyanî da. Papa Leoyê 14. got, "Dilê min bi hemû kesên ku ji şer û tundûtûjiyê li çaraliyê cîhanê dikişînin re ye. Ez bi taybetî ji bo kesên ku ji pevçûnên li ser sînorê Tayland û Kamboçyayê bandor bûne, bi taybetî ji bo zarok û malbatên ku ji cih û warên xwe bûne, dua dikim." Papa Leoyê 14. herwiha destnîşan kir ku ew ji bo kesên ku di tundûtûjiya li başûrê Sûriyeyê de canê xwe ji dest dane dua dike.
Papa Leoyê 14. di derbarê rewşa li Xezzeyê de got, "Ez bi fikarek mezin rewşa mirovî ya xerab a li Xezzeyê dişopînim ku sivîl ji birçîbûn, tundûtûjî û mirinê ya berfireh dikişînin. Ez daxwaza xwe ya ji dil ji bo agirbestek, berdana rehîneyan û rêzgirtina tevahî ji bo qanûna mirovî dubare dikim."
Papa Leoyê 14. got, "Her mirovek xwedî rûmeteke xwezayî ye ku ji hêla Xwedê ve hatiye dayîn. Ez bang li hemû aliyên şer dikim ku vê rûmetê nas bikin û dawî li her kiryarek ku wê binpê dike bînin. Ez bang li danûstandinan dikim da ku pêşerojek aştiyane ji bo hemû gelan misoger bikin û her tiştê ku dikare wê aştiyê bixe xeterê red bikin."
