Hikûmeta Xezzeyê: Ji sedî 90ê wargehên li Refahê wêran bûne

PeyamaKurd - Hat diyarkirin ku artêşa Îsraîlê bajarê Refahê ya li başûrê Şerîda Xezzeyê veguherand "herêma leşkerî ya girtî", ji sedî 90 ê wargehan hilweşand û bajar ji nexşeyê paqij kir.

Di daxuyaniya nivîskî ya ku ji aliyê Buroya Çapemeniyê ya hikûmeta li Xezzeyê ve hat dayîn de hat ragihandin ku Refeh di serdema nûjen de bûye şahidê yek ji cureyên herî xerab ên qirkirin û paqijiya etnîkî, artêşa Îsraîlê jî Refah ji bajarên din ên li Xezzeyê veguherandiye "herêma eskerî ya girtî" û "herêma bi tevahî sor" hatiye îlankirin, binesaziya sivîlan wêran dike û bi awayekî hovane bajar bê niştecîh dike.

Di daxuyaniyê de hat destnîşankirin ku Refaha ku hatiye tecrîdkirin ne tenê hatiye bombebarankirin, di heman demê de taybetmendiyên wê yên erdnîgarî û demografîk jî hatine guhertin û şêniyên wê neçar mane koç bikin. "Mezinahiya trajediya" ya li Refahê ku bi rûbera 60 kîlometreçargoşe û nifûsa wê 300 hezar kes ku bi qasî ji sedî 16ê Zîvala Xezzeyê veguherî "herêma felaketê" bi reqeman hat eşkerekirin.

Li gorî vê yekê, ji sedî 90ê xaniyên Refahê, ango zêdetirî 50 hezar xanî (nêzîkî 20 hezar avahî) bi temamî wêran bûne. Bi ser de, 22 ji 24 bîrên avê hatin rûxandin, di nav wan de "Bêla Kanada"; Ji ber vê yekê bi deh hezaran malbat bê ava vexwarinê man.

Ji sedî 85ê şebekeyên kanalîzasyonê wêran bûne. Vê rewşê bajar ji belavbûna nexweşiyan re mexdûr kir. Her wiha 320 kîlometre kolan ji ber dozeran hatin hilweşandin.

12 nexweşxane û saziyên tenduristiyê bi taybet nexweşxaneya Yûsif Neccar ji xizmetê derketin, 8 dibistan û saziyên perwerdeyê bi temamî wêran bûn û dibistanên mayî jî zirareke mezin dîtin. Zêdetirî 100 mizgeft bi temamî wêran bûne yan jî nikarin bên bikaranîn. Bi deh hezaran donim zeviyên çandiniyê bi buldozeran hatin hilweşandin, dar û sera hatin îmhakirin. 30 ji 36 avahiyên hikûmetê yên li bajêr, avahiya şaredariya Refahê jî di nav de, hilweşiyan. Ji sedî 90ê wargehan bi taybet Es-Selam, Brezîlya, taxên El-Jinîne û kampa Penaberan a Refahê wêran bûne.

Hat destnîşankirin ku girtina Deriyê Sînor ê Kerem Ebû Selîm ji mehekê ve kirîza mirovî bi rengekî nedîtî girantir kiriye û ji ber ku sotemeniya karkirina pompeyên avê û parçeyên yedek ên ku ji bo çaksaziyê hewce dikin nahêlin derbasî hundir bibin, gel ji neçarî ji pêdiviyên herî bingehîn bêpar mane.

Di dawiyê de, daxuyaniyê bang li civaka navdewletî, saziyên Neteweyên Yekbûyî û hemû rêxistinên alîkariyên mirovî kir ku "berpirsiyariya xwe ya yasayî û exlaqî bînin cih".

Ev nivîs 53 car hatiye xwendin.