Balafireke bêmirov li nêzî Qendîlê ket xwarê
PeyamaKurd – Îro, Sêşemê, li herêma çiyayî ya Qendîlê, ku dikeve nav sînorên îdarî yên Raperîn a parêzgeha Silêmaniyê, balafireke bêmirov (drone) ket xwarê. Rayedarên herêmî ragihandin ku di bûyerê de tu ziyaneke canî çênebûye.
Hevşaredarê Binarê Qendîl, Dilşêr Îbrahîm, ji medyaya herêmî re ragihand ku drone li devera di navbera gundên Pirdeşal û Zargelê de ketiye xwarê. Îbrahîm got, "Cihê ku dron lê ketibû, girekî vala û bê dar bû. Ji ber vê yekê, ti ziyaneke canî û madî çênebû."
Li gorî agahiyên ku ji aliyê hevşaredar ve hatine dayîn, li ser perçeyên balafira bêmirov nivîsên bi zimanê Tirkî hebûn. Lêbelê, heta niha ne diyar e ka drone aîdî kîjan alî ye û sedema ketina wê çi bûye.
Hin çavkaniyên xwecihî îdia kirin ku drone ji aliyê gerîlayên Partiya Karkerên Kurdistanê (PKK) ve hatiye xistin, lê ev agahî heta niha ji aliyê çavkaniyên serbixwe ve nehatiye piştrastkirin. Hêjayî gotinê ye ku hêzên çekdar ên PKKê di meha Adarê de berpirsiyariya xistina droneke Tirkî ya ji cureya Akıncı li heman herêmê li xwe girtibû.
Ev bûyer di demekê de diqewime ku li herêmê piştî banga Abdullah Ocalan, rêberê girtî yê PKKê, ji bo bidawîkirina şerê çekdarî di Sibatê de û pêngava sembolîk a şewitandina çekan di Tîrmehê de, aramiyek hebû. Ji wê demê ve, ev yekem car e ku li herêmê bûyereke bi vî rengî ya têkildarî balafirên bêmirov tê ragihandin.
Heta niha ji aliyê ti hêzeke fermî ve derbarê bûyerê de daxuyaniyek nehatiye dayîn.
Ev nivîs 90 car hatiye xwendin.
