Gava Deryaya Reş ji YEyê: Navenda ewlehiyê tê damezrandin!
PeyamaKurd – Navenda ewlehiyê ya Deryaya Reş ku ji hêla Komîsyona Ewropî ve tê pêşbînîkirin, dikare bibe alîkar ku çavdêriya rêkeftineke aştiyê ya dawî di navbera Rûsya û Ukraynayê de were kirin.
Yekîtiya Ewropayê armanc dike ku hebûna xwe li herêma Deryaya Reş, ku girîngiya xwe ya jeostratejîk ji nû ve bi dest xistiye, xurt bike. Di vê çarçoveyê de, ew plan dike ku navendek ewlehiyê ava bike ku wê binesaziya krîtîk biparêze, mayînên deryayê paqij bike, li dijî gefên hîbrîd şer bike, xetereyên jîngehê kêm bike û azadiya rêwîtiya bazirganî misoger bike.
Armanca sereke ya vê navendê ew e ku li dijî berfirehbûna Rûsyayê li Rojhilatê Ewropayê derkeve. Di demeke dirêj de, ew dikare erkê çavdêrîkirin û parastina peymaneke aştiyê ya muhtemel li Ukraynayê jî bigire ser xwe.
Nûnera Bilind a Karûbarên Derve ya YEyê Kaja Kallas roja Çarşemê got, "Herêma Deryaya Reş ji bo Yekîtiya Ewropayê xwedî girîngiyeke stratejîk e ji ber ku Asyaya Navîn bi Ewropayê ve girêdide. Herwiha ji aliyê ewlehî, bazirganî û enerjiyê ve jî girîng e."
Lê Kallas tekez kir ku potansiyela herêmê ji ber şerê Rûsyayê tê lawazkirin: "Binpêkirina qada hewayî û êrîşên li ser bender û rêyên deryayî vê rastiyê eşkere dikin."
