Hikûmeta Sûriyê bê serokwezîr û bê Kurd hate damezrandin

30.03.2025 12:28

PeyamaKurd - Serokê Qonaxa Veguhêz a Sûriyeyê Ehmed Şera, şeva borî 29ê Adarê avakirina hikûmeta nû ku dê 5 salan bêyî hilbiijartinan kar bike, ragihand.

Hate ragihandin ku 22 wezîr di hikûmetê de cî digirin, lê posta serokwezîr jî di destê Serokomarê demkî Ehmed Şera de hate hiştin. Herwiha postên herî girîng di destê kesayetiyên nêzîkî xwe de hiştin.

Tenê wekî şexs ango bêyî beşdariya aliyên siyasî yên Kurdî, kurdek û jinek jî di hikûmeta nû de hatin destnîşankirin.

Şera di merasîma eşkerekirina kabîneya xwe de gotarek pêşkêş kir û got, ew daxwazin dewleteke bihêz û aram ava bikin.

Ehmed Şera diyar kir: “Em jidayikbûna qonaxeke nû di rêwîtiya xwe ya niştimanî de dibînin. Ez we piştrast dikim ku îro destpêkek e ku em ji rabirdûya xwe ya mezin îlhamê werdigirin, da ku em bi hev re ber bi paşeroja ku em dixwazin ve bi îradeyek bihêz bimeşin.”

Li gorî kabîneya hatiye eşkerekirin, Wezîrê Derve Esed Şeybanî û Wezîrê Berevaniyê Murhef Ebû Qesra ku nêzî Şera ne, postên xwe di hikûmeta nû de parastin.

Di hikûmeta nû ya Şera de, kurdê ji herêma Efrînê Mihemed Ebdulrehman Tirko, erkê Wezareta Perwerdeyê wergirtiye.

Tenê wezîreke jin di kabîneya Şera de heye, ew jî Hind Qebewat e ku erkê Wezareta Karûbarên Civakî û Kar wergirtiye.

Berdevkê Encûmena Niştîmanî ya Kurdî li Sûriyê (ENKS) Feysel Yûsif beriya ragihandina hikûmetê gotibû, ew weke ENKSê beşdarî ragihandina Hikûmeta Veguhêz a Sûriyeyê nabin.