Macron: Em ê Filistînê wek dewlet nas bikin
PeyamaKurd – Serokkomarê Fransayê Emmanuel Macron ragihand ku welatê wî plan dike ku di Hezîrana îsal de Filistînê wek dewlet nas bike.
Macron, duh, Çarşemê di hevpeyvînekê de li gel kanaleke televizyonê ya Fransî di serdana xwe ya du rojî ya Misrê de daxuyanî da.
Macron got,
"Armanca me ew e ku em di meha Hezîranê de bi Erebistana Siûdî û çend welatên din re konferansekê bi rê ve bibin ku wê bibe sedema 'naskirinê'."
Wî di berdewamê de da zanîn, "Ez ê vê bikim… Ji ber ku ez difikirim ku ew ê adil be, û ez jî dixwazim beşdarî dînamîkeke kolektîf bibim ku dê piştrast bike ku her kesê Filistînî diparêze."
Macron destnîşan kir ku ev însiyatîfa dê rê bide Fransa ku "di têkoşîna xwe ya li dijî kesên ku mafê hebûna Îsraîlê înkar dikin zelal be" û di heman demê de pêbendbûna xwe ya "ewlehiya kolektîf a li herêmê" dubare dike.
Fransa dê di meha Hezîranê de li New Yorkê li gel Erebistana Siûdî serokatiya konferansa Neteweyên Yekbûyî ya du-rojî bike ji bo parêzvaniya çareseriya du dewletî piştî şerê 18 mehan di navbera Îsraîl û Hemasê de li Xezeyê.
Lê belê, naskirina fermî ya dewleta Filistînê ji aliyê Fransayê ve dê nîşana guhertineke girîng di siyaseta derve de be û metirsiya xerabûna têkiliyên bi Îsraîlê re bi xwe re bîne.
Niha nêzî 150 welat Filistînê wek dewlet nas dikin. Welatên Ewropî yên dawî ku ev biryar girtin di Gulana 2024an de Îrlanda, Norwêc û Spanya bûn.
Lê belê Serokwezîrê Îsraîlê Benjamin Netanyahî li dijî pêşniyara çareseriya du dewletan e û hişyarî dide ku dewleteke ku piştî êrîşên 7ê Cotmehê hatiye avakirin weke "xelat" bê dîtin.
Ev nivîs 69 car hatiye xwendin.
