سه‌رۆكى هه‌رێمى كوردستان له‌گه‌ڵ كاربه‌ڕێكه‌رى باڵیۆزخانه‌ى ئه‌مریكا كۆبووه‌وه
پەیامی کورد ... سه‌رۆكى هه‌رێمى كوردستان له‌گه‌ڵ كاربه‌ڕێكه‌رى باڵیۆزخانه‌ى ئه‌مریكا كۆبووه‌وه
چوارشه‌ممه 2025/1/29 نێچیرڤان بارزانى، سه‌رۆكى هه‌رێمى كوردستان، پێشوازی له باڵیۆز دانیال ڕۆبنستین كرد كه كاره‌كانى باڵیۆزى ئه‌مریكا له عێراق به‌ڕێوه ده‌بات.
له كۆبوونه‌وه‌یه‌كدا په‌یوه‌ندییه‌كانى ئه‌مه‌ریكا له‌گه‌ڵ عێراق و هه‌رێمى كوردستان، په‌یوه‌ندییه‌كانى هه‌ولێر ـ به‌غدا، دۆخى هه‌رێمى كوردستان، ئه‌نجامى هه‌ڵبژاردنه‌كانى په‌رله‌مان و هه‌وڵه‌كانى پێكهێنانى كابینه‌ى نوێى حكوومه‌تى هه‌رێمى كوردستان، یه‌كخستنه‌وه‌ى پێشمه‌رگه و پرۆسه‌ى چاكسازى له وه‌زاره‌تى كاروبار‌ى پێشمه‌رگه، پێشهاته‌كانى سووریا و دۆخى ناوچه‌كه، تاوتوێ كران.
باڵیۆز ڕۆبنستین جه‌ختى له پابه‌ندی ئه‌مریكا بە به‌رده‌وامی هاوكارى و پشتگیری له عێراق و هه‌رێمى كوردستان كرده‌وه، سه‌رۆك نێچیرڤان بارزانى ـ یش، سوپاس و پێزانینى بۆ هاوكارى و پشتگیریى ئه‌مریكا له عێراق و هه‌رێمى كوردستان، به‌تایبه‌تى له به‌ره‌نگاربوونه‌وه‌ى تیرۆردا، ده‌ربڕى.
هه‌ردوولا هاوڕا بوون له‌سه‌ر گرینگی پاراستنى ئارامى و سه‌قامگیرى له ناوچه‌كه و كاركردن بۆ به‌رقه‌راربوونى ئاشتییه‌كى جێگیر، هه‌روه‌ها ده‌رباره‌ی دۆخی ئێزدییان له شه‌نگال و كریستیان و پێکهاته‌کان له ده‌شتی نه‌ینه‌وا، بیروڕایان گۆڕییه‌وه.
هه‌ر له كۆبوونه‌وه‌كه‌دا كه كونسووڵى گشتی ئه‌مریكا له هه‌رێمى كوردستان ئاماده‌ى بوو، تیشک خرایه سه‌ر چه‌ند پرسێكى دیكه‌ى جێى بایه‌خى هاوبه‌ش.
ئەم بابەتە 11 جار خوێندراوەتەوە
