Amerîkayê çekên nû ji Rojava re şandin
PeyamaKurd - Balafireke barhilgir a Amerîkî ku çek û amûran barkirî bû, li Baregeha Hewayî ya Xerab El-Jeir, li bakurê rojhilatê Hesekê daket. Di dema daketina xwe de ji aliyê helîkopterên şer ve dihat parastin.
Li gorî Çavdêriya Mafên Mirovan a Sûriyeyê (SOHR), doh balafireke barhilgir a Amerîkî li baregeha leşkerî ya Xerab El-Jeir li gundewarê Ramilan, li bakurê rojhilatê Hesekê daket. Li gorî çavkaniyên herêmî, balafir çekên giran, alavên leşkerî û pêdiviyên lojîstîkî hildigirt.
Di dema daketina balafirê de li herêmê tevgera helîkopteran a dijwar hebû. Helîkopterên şer ên Amerîkî di seranserê daketinê de li dora baregehê dewriyeyan dikirin.
Di vê navberê de, li gorî SOHR, balafireke din a barhilgir a Hevpeymaniya Navneteweyî di êvara 2ê Tîrmehê de li heman baregehê daket. Ew balafir, ku ew jî pêdiviyên lojîstîkî, alavên leşkerî û cîhazên elektronîkî hildigirt, di dema daketina xwe de ji aliyê helîkopterên şer ve dihat parastin.
Hat diyarkirin ku her du barkirin di çarçoveya hewldanên Hevpeymaniya Navneteweyî de ji bo xurtkirina hebûna xwe ya leşkerî li Sûriyeyê hatine kirin.
