Borrell bangek balkêş li Îsraîlê kir!
PeyamaKurd – Nûnerê Bilind ê Polîtîkayên Derve û Ewlekariyê yê Yekîtiya Ewropayê (YE) Josep Borrell diyar kir ku ji bo agirbesta di navbera Îsraîl û Hîzbullahê de ji hikûmeta Îsraîlê bersiveke berbiçav û teqez hêvî dikin.
Nûnerê Bilind ê Polîtîkayên Derve û Ewlekariyê yê Yekîtiya Ewropayê (YE) Josep Borrell piştî hevdîtina bi Serokê Meclîsê Nebîh Berrî re li Beyrûta paytexta Lubnanê daxuyanî da çapemeniyê û bersiv da pirsan.
"Lêgerîna çareseriyê bi beşdariya DYA û Fransayê wê bi ser bikeve."
Borrell bi bîr xist ku Şewirmendê Pilebilind ê Serokê DYA Joe Biden Amos Hochstein hefteya borî hat Lubnanê û destnîşan kir ku piştî hevdîtina Berri-Hochstein pêşniyara agirbestê ji hikûmeta Îsraîlê re hatiye şandin.
Borrell diyar kir, "Em niha li benda bersiveke şênber û teqez ji hikûmeta Îsraîlê ji bo agirbestê ne. Em hêvî dikin ku ev lêgerîna çareseriyê ya ku li ser masê ye, bi beşdariya DYA û Fransayê bi ser bikeve."
Borrell diyar kir ku armanca bingehîn a Lubnanê di hevdîtina xwe ya bi Berrî re pêkanîna agirbestê ye û diyar kir ku pêwîstiya Lubnanê bi serokekî lezgîn heye.
Li aliyê din, Borrell gotinên xwe berdewam kir û got: "Divê serweriya Lubnanê di destê gelê Lubnanê de be. Nabe hêzeke navxweyî û dewletek di nava dewletekê de hebe. Divê her kes çi hundir û çi ji derve, destwerdanê li serweriya gelê Lubnanê neke."
Ev nivîs 22 car hatiye xwendin.
