Rêberê Durziyan bang kir ku di navbera wan û Rojavayê Kurdistanê de korîdoreke mirovî bê vekirin

PeyamaKurd – Şêx Hekmet el-Hicrî, rêberê ruhanî yê Durziyên Sûriyeyê, Siwêda wekî "herêma karesatê" ragihand û daxwaz kir ku korîdoreke mirovî bi Rojavayê Kurdistanê re were vekirin. Wî her weha bang li Qiralê Urdinê kir ku deriyê sînorê xwe yê ji bo alîkariyên mirovî yên ji bo Siwêdayê veke.

Şîn û hevgirtin 

El-Hicrî şîneke giştî ji bo qurbaniyên êrîşên li ser sivîlan ragihand. Ji Durziyan xwest ku ji bo piştgiriya malbatên qurbaniyan û hêsankirina karê tîmên bijîşkî ew serdanan sînordar bikin.

Têkiliyên bi Rojavayê Kurdistanê re

Şêx Hikmet el-Hicrî daxwaz kir ku rêyên gihîştinê bi HSD û Rêveberiya Xweser a Rojavayê Kurdistanê re werin vekirin.

Ji aliyê din Rêveberiya Xweser ragihand wan alîkariyên mirovî şandine Siwêdayê.

Şerên dijwar ên li Siwêdayê 

Ji Yekşema borî ve şerên dijwar di navbera Durzî û eşîrên bedewî de derketin. Hêzên Şamê hatin herêmê.

Li gorî SOHRê, 360 kes hatin kuştin, di nav wan de 107 Durzî ne û 207 çekdarên HTŞyê (rejîma demkî ya Sûriyeyê) û bedewî ne û 27 kes jî hatin îdamkirin û binpêkirinên mafên mirovan hatin kirin.

“Hişyariya qirkirinê li ser Durziyan heye”

Şêx el-Hicrî hişyarî da ku Durzî di xeteriya "qirkirinê" de ne û berxwedana wan heta vekişîna bi temamî ya hêzên Şamê dê didome. Şamê agirbest ragihand, lê Şêx el-Hicrî ev red kir.

Balafirên Îsraîlê, baregeha Şamê û qesra serokatiyê bombebaran kirin û her weha çekdarên HTŞyê jî yên ku hewil didan Siwêdayê dagîr bikin û piştî vê yekê mecbûr man ku ber bi Şamê ve vekişin.

Daxuyaniya Ehmed Şera

Ehmed Şera, serokê rejîma demkî ya Sûriyeyê got ku ewlehî dê radestî Durzî û rêberên olî bê kirin, artêş dê vekişe.

Wî tekez kir ku Durzî beşekî giring ê Sûriyeyê ne û zirardar dê bên darizandin.

Rewşa krîtîk a li Siwêdayê hê jî didome

Daxwazên mirovî yên Rêveberiya Xweser a Rojavayê Kurdistanê û Durziyan berdewam in, lê metirsiyên qirkirinê ya li ser Durziyan didome.

 

Ev nivîs 110 car hatiye xwendin.