Cihê merasîmê hat ragihandin! Merasîma danîna çekên PKKê wê li wir were lidarxistin!
PeyamaKurd - Komek endamên PKKê li nêzîkî bajarê Silêmaniyê wê îro di merasîmekê de çekên xwe deynin da ku piştgiriyê bidin pêvajoya aştiyê.
Li gorî agahiyên ku RUDAW ji rayedarên Kongreya Neteweyî ya Kurdistanê (KNK) wergirtiye, cihê merasîmê Şikefta Casene, di nav sînorên parêzgeha Silêmaniyê de hatiye destnîşankirin.
Endamê KNKê Dr. Hakim Abdulkerim, ku li herêmê amade bû, cihê merasîmê piştrast kir. Abdulkerim got, "Em niha li cihê merasîmê ne. Merasîm wê li Şikefta Casene, di nav navçeya Surdaş a Silêmaniyê de were lidarxistin."
Dema ku nûçe ji bo weşanê dihat amadekirin, hat ragihandin ku hejmareke mezin ji rojnamevan û mêvanan ji bo temaşekirina merasîmê gihîştine cihê merasîmê.
Merasîm wekî "jestek niyeta baş" a ji bo pêvajoya aştiyê hatibû plankirin û tê payîn ku çekên ku werin radestkirin di merasîmê de werin tunekirin.
