Erdogan ji bo çekdanîna PKKê û rola DEM Partiyê got: Wê siyaset xurttir bibe
PeyamaKurd - Serokomarê Tirkiyê Receb Tayyip Erdogan, di vegera xwe ya ji serdana Macaristanê de, di balafirê de ji rojnamevanan re axivî û li ser pêvajoya çekdanîna PKKê û rola DEM Partiyê daxuyaniyên girîng dan.
Erdogan got, "Biryara xwehilweşandin û çekdanîna PKK'ê, şaxê wê yê li Sûriyê YPGê jî li xwe digire. Em vê di rojên pêş de pir girîng dibînin. Saziyên me yên peywendîdar pêvajoya tevlîbûna hemû komên çekdar bo artêşa Sûriyeyê dişopînin. Em meseleya YPG/HSDê ji nêz ve dişopînin. Girîng e ku rêveberiya Şamê bala xwe ji vê mijarê dûr nexe. Ji ber ku gelek tişt hene ku niha li ser biaxivin. Em hewl didin ku ew li ser vê mijarê balê bikişînin. Pêwîst e Iraq li ser mijara kampan bisekine. Piraniya jin û zarokan, bi taybetî yên li kampa El Holê, ji Iraq û Sûriyeyê ne. Divê ew jî rola xwe bilîzin. Bi çareserkirina van pirsgirêkan, girîngiya YPGê dê kêm bibe û entegrebûna wê dê hêsantir bibe."
Erdogan diyar kir, "Ev mijar dema rehmetî Sırrı Süreyya Önder û Pervin Buldan hatin serdana min, me nîqaş kir. Îstixbarata Neteweyî ya me, bi hevkariya saziyên me yên din, xebatên derbarê Tirkiyeya bêteror de bi awayekî kontrolkirî berdewam dike. Di dema serokwezîriya min de min binaxkirina çekan anîbû ziman. Di asta ku em hatinê de, ev gotina min vegeriya çekdanîn û teslîmkirina çekan. Dema ev gav werin avêtin, şehîdên me jî inşallah ê bigihîjin aramiyê.
Ji aliyê din ve, her ku ji vesayeta çekan rizgar dibin, Partiya DEMê jî derfeta berdewamkirina têkoşîna xwe ya siyasî bi awayekî pir cûda bi dest dixe. Li Meclîsê ji 50î zêdetir parlamenterên wan hene. Berdewamkirina siyaseta bi awayekî pir xurtir wê avantajên nû ji DEMê re peyda bike. Nîşandana cudahiya DEMê di dema nû de hem ji bo bingeha wan, hem jî ji bo welatê me wê bi xêr be.”
Ev nivîs 122 car hatiye xwendin.
