Piştî ku rêvebiriya Trump ji danûstandinên agirbesta Xezeyê vekişiya, planên alternatîf têne nirxandin
PeyamaKurd – Rêveberiya Donald Trump ragihand ku ji ber “serhişkiya” Hemasê, ew ji danûstandinên agirbesta Xezeeyê vekişiyaye.
Steve Witkoff, nûnerê taybet ê aştiyê yê Trump, Hemas bi “nebûna niyeta baş” di danûstandinan de tawanbar kir û got ku rêveberî niha li ser planên alternatîf dixebite da ku rehîneyên Îsraîlî rizgar bike û aramiyê li Xezeyê pêk bîne.
Witkoff li ser platforma Xê daxuyaniyek da û got: “Bersiva Hemasê eşkere nîşan dide ku ew agirbestê naxwazin. Ji ber vê yekê, me biryar da ku tîma xwe ji Dohayê vekişînin û şêwirmendiyê bikin.” Wî tekez kir: “Em ê vebijarkên nû binirxînin da ku rehîneyan vegerînin malên xwe û ji bo gelê Xezeyê jîngeheke aramtir ava bikin. Reftara xweperest a Hemasê em xemgîn kirin, lê em bi biryar in ku vê pevçûnê bi dawî bikin.”
Balyozê Îsraîlê yê Neteweyên Yekbûyî di destpêka Tîrmehê de li Washingtonê ragihandibû ku ger Hemas peymanê red bike, planên leşkerî dê ji nû ve bêne nirxandin. Karbidestên Îsraîlî piştgirî didin banga Trump a ji bo koçberkirina Filistîniyan ji Xezeyê. Trump di meha Sibatê de pêşniyarek kiribû, ku tê de Xezeyê di bin kontrola Amerîkayê de bihêle û Filistîniyan bi awayekî daîmî koçber bike, da ku herêm wekî “cihê betlaneyê” ji nû ve bê avakirin.
Berdevkê Ofîsa Serokwezîrê Îsraîlê, roja Çarşemê got: “Serok Trump ji bo pêşeroja Xezeyê planeke nûjen pêşkêş kiriye. Divê kesên ku bi dilxwazî dixwazin biçin, destûr ji bo wan bê dayîn.” Hin welatan amadebûna xwe nîşan dane ku Filistîniyên ji Xezeyê qebûl bikin.
Ev biryara rêveberiya Trump wekî derbeyeke giran li ser gelê Xezeyê tê dîtin, ku jixwe di bin şert û mercên mirovî yên dijwar de ne. Li gorî agahiyan, birçîbûn ji ber kaos û xetereyên di dema belavkirina alîkariyê de zêde dibe. Têkçûna danûstandinan çarenûsa 20 rehîneyên sax û termên 30 rehîneyên din ên di destê Hemasê de ne diyar dihêle.
Karbidestên Amerîkî û Îsraîlî Hamasê bi dizîiya alîkariyên mirovî û sûdwergirtina ji êrîşa 7ê Cotmeha 2023yan tawanbar dikin. Hikûmeta Îsraîlê ragihand ku heta niha 895 leşkerên wê di şer de jiyana xwe ji dest dane. Rêveberiya Trump diyar kir ku ew ê di demeke kurt de hûrguliyên planên alternatîf eşkere bike.
Ev nivîs 109 car hatiye xwendin.
