Washington, dê bi nirxê 322 milyon dolarî çekan bifiroşe Ûkraynayê

PeyamaKurd – Dewletên Yekbûyî yên Amerîkayê duh ragihand ku firotina çekan a bi nirxê 322 milyon dolarî ya ji bo Ûkraynayê erê kiriye, da ku parastina hewayî û flota wesayîtên zirxî yên Kîevê xurt bike.

Ev biryar di demekê de hat dayîn ku şerê di navbera Rûsya û Ûkraynayê de berdewam dike û Ûkrayna rastî êrîşên giran ên mûşekî û dronên Rûsyayê tê.

Li gorî Ajansa Hevkariya Ewlehiya Parastinê ya Amerîkayê (DSCA), peyman 2 beşan li xwe digire: firotin û piştgiriya alavên Sîstema Parastina Hewayî ya Hawkê ya bi nirxê 172 milyon dolarî û wesayîtên şer ên zirxî yên Bradleyê yên bi nirxê 150 milyon dolarî.

DSCAyê diyar kir ku ev firotin dê qabiliyeta Ûkraynayê ya li hember gefên heyî û yên pêşerojê zêde bike û parastina wê ya hewayî dê bihêz bike, ku ev yek ji bo ewlehiya herêmî giring e.

Her weha, alavên Bradleyê dê piştgiriyê bidin hewcedariyên lezgîn ên Ûkraynayê ji bo xurtkirina parastina herêmî û domandina rêjeyên xebitandinê yên bilind ji bo pergalên çekan ên ji aliyê Amerîkayê ve hatine peydakirin.

Wezareta Derve ya Amerîkayê ev peyman pejirand û DSCA hêvî dike ku Kongre piştî pêşkêşkirina belgeyên pêwîst erê bike. Ev peymana leşkerî piştî firotineke din a di Gulanê de bi nirxê 311 milyon dolarî ji bo perwerde û parçeyên yedek ên balafirên F-16 hat kirin.

Di sala 2022yan de, Serokê Rûsyayê Vladimîr Pûtîn fermana dagirkirina Ûkraynayê da, lê tevî zextên Amerîkayê, nîşanên dawîanîna şer neda.

Di dema serokatiya Joe Biden de, Amerîkayê zêdetirî 65 milyar dolar alîkariya leşkerî soz da Ûkraynayê. Lêbelê, Donald Trump, ku ji Çileya 2025an ve dest bi kar kiriye, heta niha pakêteke nû ya alîkariya leşkerî ji bo Kîevê ranegihandiye.

Ev nivîs 117 car hatiye xwendin.