Wezîrê Derve yê Amerîkayê û Sûdanî bi telefonê axivîn
PeyamaKurd - Tê gotin ku Wezîrê Derve yê Amerîkayê Marco Rubio bi Serokwezîrê Iraqê Mihemed Şîa Sûdanî re li ser sê mijarên girîng axivîne.
Li gorî daxuyaniyek ji Wezareta Derve ya Amerîkayê, Wezîrê Derve yê Amerîkayê Rubio bi telefonê bi Serokwezîrê Iraqê Sûdanî re axivîne.
Tê gotin ku Rubio li ser dayîna mûçeyên karmendên Herêma Kurdistanê, hinardekirina petrola Herêma Kurdistanê û kêmkirina bandora Îranê li Iraqê axivîne.
Di pêwendiya telefonê de, Marco Rubio girîngiya hesabpirsîna kesên ku di êrîşên dawî yên li ser binesaziya enerjiyê ya Iraqê de beşdar bûne û pêwîstiya girtina tedbîran ji bo pêşîgirtina li êrîşên bi vî rengî yên din tekez kir.
Wezîrê Derve yê Amerîkayê herwiha girîngiya berdewamiya dayîna mûçeyan û ji nû ve destpêkirina hinardekirina petrolê bi rêya boriya Iraq-Tirkiyeyê tekez kir.
Rubio fikarên cidî yên Amerîkayê li ser projeyasaya ku ji aliyê Parlamentoya Iraqê ve derbarê hêzên Heşdî Şebî de hatiye pejirandin, dubare kir û diyar kir ku ev projeyasa wê bandora komên çekdar xurt bike.
