Serok Barzanî pêşwaziya Ahmet Davutoglu kir
PeyamaKurd – Serok Barzanî bi Serokê Partiya Pêşerojê Ahmet Davutoglu re behsa pêvajoya çareseriyê ya li Tirkiyeyê kir. Pêvajoya Barzaniyê û Davûtoglû wekî "gaveke girîng û dîrokî" hat wesifandin.
Li navçeya Selahedîn a Hewlêrê doh Serok Mesûd Barzanî ligel Serokwezîrê berê yê Tirkiyê û Serokê Partiya Pêşerojê Ahmet Davutoglu civiya.
Li gorî daxuyaniya ofîsa Serokatiya Herêma Kurdistanê, di civînê de, pêvajoya çareserkirina pirsgirêka Kurd li Tirkiyê hatiye rojevê.
Barzani û Davutoglu tekez kirin ku ev pêvajo ji bo aştiya herêmî "gaveke girîng û dîrokî" ye.
Di civînê de, ji bo serkeftina pêvajoyê, girîngiya beşdariya hemû aliyan hate destnîşankirin.
Ahmet Davutoglu ji bo piştgiriya wî ya ji bo pêvajoyê spasiya Serok Barzani kir û diyar kir ku ew rola Barzani di pêvajoyê de bi qîmet dibîne.
Di civînê de herwiha li ser pêşketinên dawî yên li herêmê û çarçoveya giştî ya guhertinên di demên berê û pêşerojê de nîqaş hatin kirin.
Ji aliyê din ve, Davutoglu li ser hesabê xwe yê medyaya civakî X jî derbarê hevdîtinê de ev tişt parve kir:
"Di çarçoveya têkiliyên me yên li ser bingeha dostaniya kevnar û dîroka me ya hevpar de, me bi Serokê berê yê Herêma Kurdistanê, Birêz Mesûd Barzanî û şanda wî ya birêz re hevdîtinek berhemdar kir."
Em bi tundî bawer dikin ku ewlehî, aştî, îstîqrar û geşepêdana hevbeş a herêmî tenê bi diyalog, têgihîştina dualî û hevkariyê mimkun e.
Divê em bi hev re hewlên xwe bidomînin da ku hêviyan li Rojhilata Navîn vejînin, tevahiya herêmê dîsa veguherînin axên berhemdar, biratiya xwe xurt bikin û pêşeroja xwe ya hevpar bi hev re ava bikin!
Em xwedî îradeya tevahî ne ku mil bi mil girêdanên biratiyê yên ku ji vê berpirsiyariya dîrokî derdikevin, hilgirin."
